Roza Bağlanova atyndağy «Qazaqkontsert» memlekettik akademiyalyq kontserttik ūiymynyñ Kishi zalynda küi anasy Dina Nūrpeiisovanyñ 165 jyldyğyna arnalğan «Äsem qoñyr» kontserti ötedi.

Tağylymdy keshtiñ maqsaty - Dina Nūrpeiisovanyñ shyğarmashylyq mūrasyn keñinen nasihattap, ūlttyq küi öneriniñ körkemdik ereksheligin jaña buyn tyñdarmanğa tanystyru.

Kontsertte Qazaqstannyñ eñbek siñirgen qairatkeri  Äbilğazy Ahmadiev, PhD doktory, küishi-zertteushi Aitolqyn Toqtağan, küishi Mūqağali Rysqaliev, respublikalyq baiqaulardyñ laureattary Aisholpan Qasymova men Beknūr Äbdijäli, sondai-aq jas dombyrashylar Qadiräli Bürkit, Valeriya Bölekbai, Adinai Bağaeva, Dana Didar jäne qyzdar ansambli öner körsetedi.

Bağdarlamada Dina Nūrpeiisovanyñ «Äsem qoñyr», «Būlbūl», «Baijūma», «Domalatpai», «Nauysqy», «Tartu-Sälemdeme», «Ana būiryğy», «Jiger» küilerimen qatar Qūrmanğazy, Däuletkerei, Seitek, Jantöre, Qazanğap, Sügir jäne özge de däulesker küishilerdiñ shyğarmalary oryndalady.

«Äsem qoñyr» -  ğasyrlardan jetken küi mūrasyn ūlyqtap, ūlttyq önerdiñ syrly älemine jeteleitin ruhani kesh.